Baharyň ilki güni

Baharyň uzakda däldigni duýup,

Agylyndan çykjak bolýar dowarlar.

Şu günki çabgada ölmese buýup,

Ertir-ä olary örä kowarlar.

Öýlänçi ýagyşda, ýumşak şemalda,

Bigam argynlykda duýulýar maza.

Garry-gurtularyň käbiri şu gün,

Öýle namazynam goýupdyr kaza.

Öýde diňe üme düşmez bäbekler,

Öý hojalykçylar hemem hassalar.

/Ýüregiň awaýar şo bendelere,

Düşeginden galyp bilmän ýatsalar/.

Dükanyň işigi, urpajyk çäge,

Gojalaryň üýşýän ýeri owaldan.

Han-ha, eýýäm birnäçesi gelipdir,

Köwşüni aýaga çekip gowallaň.

Bazaryň nyrhyndan hemem ýaşlardan,

Zeýrenen bolýarlar endige görä.

Ýöne gamlanmaga sebäp ýok, şükür,

Durmuş hiç neneň däl, hezillik örän.

Uruş-gykylyk ýok, syrkawçylyk ýok,

Garrylyk derdi hem berenok azar.

Uly günä däldir, bular ýaly gün,

Öýle namazyny goýsaňam kaza.