Dostuma

Däli deňziň garşysyna gaýykly,

Ýör, gideli,

tijen dostum,

kürekle.

Ýaýdanmaly, şowsuzlyk nä aýypmy?

Beýik işe hyjuw barka ýürekde.

Çagalykda at edindik hyşany,

Ýigit çykyp, dosta serbe-ser gezdik.

Dostdan galan ýadygärlik nyşany,

Bir husydyň baýlygyna bermezdik.

Seret, ümür basan kenara seret,

Soň ýatlap ýörmäge göwnüň küýsände.

Äkit, bir hepdelik azyga derek

Mähribanyň suratyny kisäňde.

Çola kenar — dolanmajak geçmişdir,

Tupana döş gerip, äkider ýelken.

Ykbal bagty, gör, nirede seçmişdir,

Bir ajap, ýagty gün duşarys, belkem!