Toýa gitdim

«Çakyr kelle togalanar toý bolsa»,

Diýip menem bardym iliň çetinden.

Nahar iýdim,

toý töwirin galdyrdym.

Berhiz saklap, datmasamam etinden.

Toý gowy zat,

hemmäniňem arzuwy,

Tuwmaýak bolmasa, gyzsyz-ogulsyz.

Ýyldyzlary duşup, ýaş çatynjalaň,

Ak posalak bäbejikler dogulsyn.

Hany, toýuň bagşysynam diňläli,

Aýdyp bilýärmikä «Amman-ammany».

Ýogsam kä aýdymdan ýüzüň utanýar,

Geýip çykan ýaly ýyrtyk tammany.

Hindiçe tans edýär başaçyk bir gyz,

Nämemikäm diýýär saçy kesilen.

Ýüregiňi gopdurýan saz ýokmy başga,

«Sen-sen» bilen «Uçradym» bar, meselem.

Bilýän däldir heniz

ulaljagyny,

Ýaşkaň sähelçejik goýberseň hata.

Deň-duşum däl,

meniň sözüm diňlenmez,

Besdir, gulak goýsa enedir ata.

Indi gaýdaýsamam bolman durjak däl,

Öýde-de iş kändir, kändir alada.

Çet ýurduň sazlaram ýakymly ýaly,

Uzaklardan eşidýärkäň çalaja.

Allajan hemmäni toýa ýetirsin,

Däl özümem, şükür, ogulsyz-gyzsyz.

Öýlenjek öýlensin wagty ýetende,

Ýetişen gyzyňam başy bogulsyn!