At dakylmadyk gahrymanlar

Orta boýly, alçak agam

Öz dulunda ölmedi.

Bu wagta çen ýedi, sekiz,

On...

perzentli boljak agam

Gitdi, gaýdyp gelmedi.

Gitdi şeýdip

milýon-milýon

Atalardyr agalar.

Ine şeýdip önmän galdy

Ýene-de bir şonça milýon,

Ýene-de bir şonça milýon

Dünýä injek çagalar.

Käte-käte dürli oýlar

Hemra bolýar adama:

Dünýä injek şol çagalar

Düşdi şu gün ýadyma.

Şu setirlem şolar üçin

Bolsun – diýýän – ýadygär.

Olar atsyz bolsalar-da,

Ol ezizleň ady bar.